Lipad na mahal, bulsa ang sugatan

MASAYA raw ang Air Carriers Association of the Philippines (ACAP) sa hakbang ng gobyerno na gawing mas abot-kaya at mas bukas sa lahat ang biyahe sa himpapawid. Maganda pakinggan. Pero sa baba sa check-in counter, sa boarding gate, at lalo na sa resibo iba ang kuwento ng mga pasahero.

Ika nga, bukas daw ang mga airline na makipagtulungan sa gobyerno at iba pang sektor para sa pangmatagalang solusyong pababain ang gastos, ayusin ang imprastraktura, at pagdugtung-dugtungin ang mga isla ng bansa. Iisang layunin daw paunlarin ang turismo at panatilihing gumagalaw ang tao at produkto sa buong Pilipinas.

Totoo naman lampas na raw sa antas bago ang pandemya ang dami ng pasaherong bumibiyahe. Ibig sabihin, buhay na buhay ang merkado. Pero kung buhay na buhay, bakit pakiramdam ng pasahero, pinipiga ang huling sentimo sa bawat lipad?

Aminado ang ACAP  hindi lang pamasahe ang problema. Nariyan ang singil sa paliparan, buwis, at mga limitasyon sa imprastraktura. Sa maraming probinsiyang paliparan na maikli ang runway, napi­pilitang gumamit ng maliliit na eroplano kaunti ang upuan, mas mahal ang gastos kada pasahero. Ang ending? Masakit sa bulsa ang tiket, kahit maikli lang ang biyahe.

Sang-ayon dito ang Civil Aeronautics Board (CAB). Kaya raw may ginagawa na: pahahabain ang mga runway para makalapag ang mas malalaking eroplano, at gagawing “night-rated” ang mga paliparan para mas dumami ang flight. Sa papel, maganda. Sa pangako, maayos. Pero sa kasalukuyan, ang tanong ng pasahero: kailan mararamdaman?

Habang nagmi-meeting ang mga asosasyon at ahensiya, ang ordinaryong Pilipino ay nagbibilang ng barya, nagkakansela ng biyahe, o napipilitang sumakay ng barko kahit mas matagal at mas delikado dahil lang hindi na kaya ang presyo ng eroplano.

Sabi ng ACAP, kaya raw nating bumuo ng mas matibay at mas murang sistema ng domestic air transport. Sana nga. Pero hindi puwedeng puro “kaya” at “bubuuin.” Kailangan ng konkretong galaw, malinaw na timetable, at tunay na ginhawang mararamdaman ng pasahero hindi lang ng airline at ng mga numero sa report.

Sa huli, simple lang ang hiling ng mananakay. Makalipad nang ligtas, maayos, at hindi kinakailangang mangutang.

Disclaimer: Ang artikulong ito ay isang komentaryong pampubliko na nakabatay sa mga pahayag ng mga kinauukulang ahensya at sektor. Layunin nitong ipahayag ang saloobin at karanasan ng mga pasahero at hindi upang manira ng anumang indibidwal o institusyon.