Masakit na katotohanan tungkol sa family dynamics (Last part)

• Ang batang lumaki mula sa broken home ay malaki ang tsansang magkaroon ng malaking “sugat” sa kanyang pagkatao. Kapag ang isang bata ay lumaki sa isang broken home, halimbawa, may matinding alitan ng magulang, hiwalayan, o kakulangan sa emosyonal na suporta—maaari itong mag-iwan ng malalim na sugat sa kanilang damdamin at pag-iisip. Kapag hindi ito napagaling o naproseso, maaaring dalhin ng bata ang mga sugat na ito hanggang sa pagtanda, na makakaapekto sa kanyang pakikipagrelasyon, tiwala sa sarili, at paraan ng pagharap sa problema. Gayunman, mahalagang tandaan na hindi lahat ng lumaki sa sirang pamilya ay nagiging broken adult. Marami pa rin ang nagiging matatag, responsable, at mapagmahal na tao. Sa halip na makasira ang pangit na nakaraan, ito ay itinuring nilang “inspirasyon” para bumangon.

• Ang mga magulang na araw-araw nag-aaway ay nagtuturo sa mga anak na tanggapin ang kaguluhan bilang isang normal na bagay. Kapag palaging nakikita ng mga bata ang away at sigawan sa loob ng tahanan, unti-unti nilang iniisip na ito ang normal na anyo ng relasyon. Nadadala nila ang paniniwalang ito sa kanilang paglaki—na okay lang ang gulo, galit, at hindi maayos na komunikasyon. Bilang resulta, maaari silang pumasok sa mga relasyon na puno ng tensyon o magpakita rin ng parehong asal, dahil iyon ang kanilang nakasanayan at inakalang tama.

• Ang mapayapang tahanan ay humuhubog ng kumpiyansang isipan. Kapag ang isang tao ay lumaki sa isang tahanang puno ng katahimikan, respeto, at pag-unawa, nagiging matatag ang kanyang loob at tiwala sa sarili. Ang kapayapaan sa loob ng bahay ay nagbibigay ng emosyonal na seguridad, kaya mas nagiging handa ang isang tao na harapin ang mga hamon sa labas ng tahanan. Sa madaling salita, ang maayos at payapang tahanan ang pundasyon ng isang kumpiyansa at positibong pag-iisip.