Lapis (Part 5)

HABANG tumatakbo ako nang mabilis ay hawak ko pa rin ang lapis na pinangsaksak ko sa balahibuhing braso.

Siguado ako na malalim ang pagkakabaon ng lapis sa braso dahil naalis ang pagkakaakbay sa akin. Wala naman akong narinig matapos kong saksakin. Wala akong narinig na “aray” o anuman.

Sa bilis ng aking takbo, hindi ko namalayan na nasa tapat na ako ng aming bahay.

Saka ako biglang sumigaw at umiyak nang malakas.

Dahil sa lakas ng sigaw at iyak, naglabasan sa bahay ang aking ama, ina at kapatid.

“Anong nangyari? Bakit ka sumigaw?” tanong ni Tatay.

“Bakit Maria? Bakit takot na takot ka?” tanong ni Inay.

Hindi ako makapagsalita. Shock ako sa nangyari.

Inalalayan ako nina Tatay at Inay patungo sa bahay.

Napansin ni Tatay ang hawak kong lapis.

“Bakit hawak mo ang lapis?”

Hindi pa rin ako makasagot.