EDITORYAL - Sunod-sunod na aksidente sa kalsada
KAHAPON isang bus na may lulan na 23 kabataan mula Quezon City ang naaksidente sa Infanta, Quezon dakong alas onse ng umaga. Isa ang kumpirmadong namatay. Patungo ang grupo sa youth camp nang mag-overshoot at tumagilid ang bus sa Bgy. Magsaysay.
Bago mag-Pasko, anim katao ang namatay at 20 ang nasugatan nang mahulog sa bangin ang DLTB Bus sa Bgy. Magais I, Del Gallego, Camarines Sur. Galing Cubao, Quezon City ang bus at patungong Sorsogon nang maganap ang insidente. Nawalan umano ng control sa manibela ang drayber kaya tuluy-tuloy na nahulog sa bangin ang bus.
Ayon sa pulisya, nakatulog ang bus driver kaya nangyari ang insidente. Sabi naman ng ilang pasahero, masama ang pakiramdam ng bus driver kaya nagkaaberya sa pagmamaneho.
Noong Nobyembre 25, isang dump truck ang nawalan ng preno at inararo ang anim na sasakyan sa unahan nito bago bumangga sa poste ng kuryente. Tatlo katao ang namatay kabilang ang driver ng dump truck. Nangyari ang insidente sa Sumulong Highway, Bgy. Dela Paz, Antipolo City.
Ayon sa pulisya galing sa Bulacan ang dump truck at may kargang buhangin. Hindi umano kinaya ng preno ang mabigat na karga ng truck kaya inararo ang mga sasakyan.
Noong Nobyembre pa rin, isang dump truck din ang nawalan ng preno at inararo ang mga sasakyan bago bumangga sa stop light sa Mindanao Avenue, Quezon City. Wala namang namatay sa insidente subalit maraming nasirang sasakyan.
Mula Disyembre 21-26, 2025, nakapagtala na ang Department of Health (DOH) ng 263 road crash injuries sa buong bansa. Seven percent na mababa ito kumpara sa mga nangyaring insidente noong nakaraang taon sa kaparehong petsa.
Ayon sa DOH, 31 kaso ay dahil sa pagmamaneho ng lasing at 224 ang hindi gumamit ng safety accessories, gaya ng helmet at seatbelt. Paalala ng DOH na huwag magmaneho kapag pagod o lasing upang maiwasan ang road crash. Siguruhing nakatulog ng 7-8 oras bago bumiyahe. Iwasan din ang paggamit ng cell phone habang nagmamaneho.
Bukod sa pagmamaneho ng lasing, may mga insidente rin ng drugged driving o nakagamit ng illegal drugs habang nagmamaneho. Paigtingin ng Land Transportation Office (LTO) ang pag-monitor sa mga nagmamaneho ng lasing. I-drug test nang regular ang mga bus driver upan masiguro ang kaligtasan ng mga pasahero.
- Latest
