‘Manika’ (Part 3)
“BUKSAN mo na Marie ang box para makita mo ang manika na regalo ni Ninang Nerry mo,’’ sabi ni Mama.
Hindi pa rin ako kumilos. Nanatili akong nakatingin kay Mama.
“Ano bang nangyayari sa’yo Marie? Hindi ka ba natutuwa na niregaluhan ka ng manika?”
“Ayoko ng manika, Mama!” sabi kong maiiyak.
“Bakit?”
“Natatakot ako sa manika!”
“Anong nangyayari sa iyo, Marie? Bakit ka natatakot sa manika?”
“Hindi ko alam Mama! Basta natatakot ako sa manika! Ayoko ng manika!” sabi ko at tuluyan nang umiyak. Humagulgol ako. Ibinuhos ko ang matagal nang kinikimkim na pagkatakot sa manika.
Niyakap ako nang mahigpit ni Mama. Naramdaman ko ang awa niya sa aking kalagayan.
“Kailan ka pa nagkaroon ng takot sa manika, Marie.”
“Mula pa po nung Grade 1 ako Mama. Kapag dinadala ng mga classmate ko ang manika nila sa school, nakakaramdam ako ng takot. Basta ganun ang nararamdaman ko.”
Napabuntunghininga si Mama. Problemado siya. (Itutuloy)
- Latest
