Mga lamok…

“BAOY”. Hindi ko alam kung saan nagmula ang salitang ito. Hindi ko rin alam kung ito ay original Tagalog word. Basta’t lagi kong naririnig ang salitang ito tuwing may away na nangyayari sa aming angkan. Ang ibig sabihin ng baoy ay pagsumbat sa mga bagay o pabor na naibigay sa taong natulungan.

Halimbawa, may ikinagalit ang isang kamag-anak sa aking ina o ama, biglang mambabaoy ang mga ito ng mga  bagay na naibigay niya o kaya ay naitulong mula nineteen kopong-kopong hanggang sa kasalukuyan.

Bata pa lang ako noon pero unawang-unawa ko na kapag nagdayalog ang aking ama’t ina ng— “O, ayan, binaoy na naman tayo. Hayyy, kailan kaya tayo makakawala sa pambabaoy ng mga iyan. Tuwing magagalit ay iisa-isahin ang mga pabor na naibigay na ng matagal na panahon.”

Minsan, nangutang ang isang kamag-anak sa akin pero hindi ko pinagbigyan dahil may utang pa ito sa akin na hindi nababayaran. Isa pa, lagi rin akong gipit sa pera nang panahong iyon.

Gaya ng dapat asahan, nagtampo ito. Hindi makalimutan na hindi ko siya pinautang, pero nakalimutan na may utang siyang hindi pa nababayaran. Nagsumbong sa mga kapatid nang umuwi sa probinsiya. Pareho kaming nakatira sa Maynila ng nangungutang na kamag-anak. Wala raw akong utang na loob samantalang tinulungan nila ang aking ama noong araw.

Nakarating ang panunumbat sa akin. Napaawa ako sa aking ama. Matagal nang humalo ang katawan sa lupang kinalibingan nito pero hindi pa rin makawala sa pambabaoy ng kamag-anak.

“Mosquitoes are like relatives, annoying but they carry your blood.”

Funnystatus.com