‘Walis’ (Part 14)
“Edi wala na pong katulong ngayon si Tiya Clems, Ate Lydia?’’ tanong ko.
“Meron na uli. Pero alam mo, palagay ko ay hindi rin tatagal ang katulong ni Clems.”
“Bakit po?’’
“Madalas kong marinig na pinagbubuhatan din niya ng kamay ang bagong katulong. Kamakalawa, may narinig akong pinapalo ng stick at kasunod ay umiiyak—palagay ko nagkamali ang katulong kaya sinasaktan.”
“Wala pong ipinagkaiba sa ginawa sa akin, Ate Lydia?”
“Oo. Pero ang masakit nga, kadugo mo siya. Di ba kapatid siya ng mother mo?’’
“Opo.’’
“Palagay ko may sakit na si Clems dahil hindi niya mapigilang manakit. Para bang nasisiyahan siya kapag may sinasaktan.”
“Yun nga po ang pakiramdam ko, Ate Lydia.”
“Dapat magpakunsulta siya sa pscychiarist.”
“E Ate Lydia, wala po ba siyang hinala na ikaw ang tumulong sa akin kaya ako nawala sa kanyang poder?”
“Wala. Ni hindi ka nga nababanggit kapag nag-uusap kami. Siguro gusto niyang itago ang pagkawala mo.”
“Hindi po kaya ako hinanap?”
“Palagay ko ay hindi.”
“Balewala talaga sa kanya kahit magkadugo kami. Mabuti pa ang mga hindi ko kadugo at nagmalasakit sa akin—tulad mo Ate Lydia at ni Ate Marie.” (Itutuloy)
- Latest
