First Lady ang lihim na Presidente

NAGKAROON kasi ng twist ang mga pangyayari. Si Woodrow Wilson, ika-28 Presidente ng United States ay nahalal noong 1913. Pagkatapos niyang dumalo ng global meeting sa Paris noong 1919, siya ay na-stroke pagbalik niya sa U.S.

Simula noon, siya ay naratay sa karamdaman kung saan hindi niya maigalaw ang kalahati ng kanyang katawan, nawalan ng kakayahang maglakad, makapagsalita at  makapagsulat. Sa kabila nito, hindi naman naapektuhan ang kanyang intellectual capacity.

May dalawang options na ibinigay ang mga adviser kay First Lady Edith Wilson: Una: Ipaalam sa publiko ang nangyari at i-give up ang pagiging Presidente. Ikalawa: Mag-take over si Edith Wilson at siya ang gumawa ng duties ng asawa.

Nagpasya si Edith at mga adviser na ilihim sa publiko ang nangyari kay Presidente Wilson at si Edith ang magiging acting President.

Ang sumunod na hakbang ay ipinaalam nila sa publiko na hindi na muna magpapakita sa publiko ang Presidente dahil magpopokus muna ito sa marami niyang gawain. Ibig sabihin, pansamantala muna siyang hindi makikipagkita sa press, sa kanyang Cabinet at sa publiko.

Lingid sa kaalaman ng publiko, si Edith ang naging acting President hanggang 1921. Paminsan-minsan, kinukunsulta niya si Woodrow Wilson kapag ito ay bumubuti ang pakiramdam. Walang kamalay-malay ang mga Amerikano na babae na pala ang kanilang Presidente ng mga panahong iyon. Pumanaw si Woodrow Wilson noong 1924 sa edad na 67.