‘Labaha’ (Part 10)
NAGTAGO ako sa gilid ng cabinet makaraang patayin ang kandila. Si Inay ang lumabas sa kuwarto. Naamoy niya ang usok ng kandila kaya hinanap kung saan nanggagaling.
Binuksan ang ilaw.
Nakita ako ni Inay na nakasiksik sa cabinet.
“Anong ginagawa mo riyan, Paul?’’ tanong nito.
Nagsinungaling ako. Mabilis akong nakaisip ng paraan.
“Hinahanap ko ang eraser sa cabinet Inay.”
“E bakit diyan mo hinahanap? At bakit hindi mo buksan ang ilaw? Nagsindi ka pa ng kandila e kung mapadikit yan sa kurtina.’’
“Sa cabinet ko po huling nakita ang eraser, Inay.’’
Tiningnan ako nang tuwid ni Inay.
Binabasa kung nagsasabi ako ng totoo.
“Walang eraser diyan dahil nilinis ko yan kamakalawa. Inalis ko lahat ng mga hindi pakikinabangan diyan.’’
Hindi na ako nagsalita.
“Matulog ka na at bukas ng umaga ay tutulungan kitang maghanap sa eraser.’’
“Opo, Inay.’’
“Akina ang kandila.’’
Ibinigay ko.
Pumasok na ako sa kuwarto naming ng kapatid ko.
Bukas, ipagpapatuloy ko ang paghahanap sa kinamumuhian kong labaha! Hindi ako titigil hangga’t hindi iyon nakikita! (Itutuloy)
- Latest
