Lalaki, napuntahan lahat ang Disneylands sa buong mundo sa loob lang ng 12 araw!

ISANG Disney fan ang napuntahan lahat ang Disney theme park sa buong mundo sa loob lamang ng 12 days!

Sinimulan ni Nathan Firesheets ang proyekto niya na pinamagatang “The Disney Global Ride Challenge” noong Marso 8 sa Disneyland Paris at natapos ito ng Marso 19 sa Magic Kingdom sa Florida.

Sa pagitan ng mga nabanggit na petsa, binisita ni Firesheets ang Walt Disney Studios, Shanghai Disneyland, Hong Kong Disneyland, ­Tokyo DisneySea, Disneyland, Disney California Adventure, Epcot, Animal Kingdom at Hollywood Studios.

Sinakyan ni Firesheets ang lahat ng rides sa bawat theme park kaya nakasakay siya sa mahigit 216 rides sa buong mundo.

Noong siya’y bata pa, pangarap lamang noon ni Firesheets na makapunta sa pinakaunang Disneyland sa Anaheim, California kaya hindi siya makapaniwala na napuntahan na niya lahat ng Disney theme parks sa buong mundo.