Cobras mitukob sa korona

CEBU, Philippines — Gipamatud-an sa Southwestern University (SWU)-Phinma Cobras nga dili tsamba ang ilang kadaogan batok sa University of the Visayas (UV) Green Lancers aron sakmiton ang labing una nilang korona sa Cebu Schools Athletics Foundation, Inc. (CESAFI) Partner's Cup niadtong Agosto.

Bugtong kalahian lamang kay walay sweep nga nahitabo ning higayona.

Ang Cobras namawi human napapas ang 18 puntos nilang labaw sa second half aron palayason sa ilang trono ang three-time defending champion Lancers, 64-60  sa knockout Game-3 sa ilang best-of-three finals aron langkaton ang una nilang CESAFI basketball title sud sa lima ka tuig niadtong Biyernes sa gabii diha sa Cebu Coliseum.

"Siyempre it's a big relief kasi when coach Yayoy left, it's a huge rebuilding program for us. I then asked the SWU-Phinma management to give me three years and I'm happy that we delivered right on our target," matud pa ni SWU-Phinma coach Mike Reyes nga miangkon sa labing una niyang kampiyonato isip head coach sa usa ka Cebu collegiate ballclub.

Si Reyes assistant kaniadto ni coach Yayoy Alcoseba sa dihang katapusan nakampiyon ang SWU niadtong 2014.

Ang Cobras miposte og 40-22 nga labaw, apan ang Lancers milusad og 23-2 rally hinungdan sa pag-abante niini, 45-42 sa nahibiling dos minutos sa ikatulong kuwarter.

Nabira hinuon og balik sa Cobras ang labaw, 55-52 kortesiya sa tulo ka sagunson nga tres ni league MVP Shaquille Imperial, apan si Lass Coulibally miposte og unom ka sunod-sunod nga puntos aron pagpalabaw og balik sa Lancers, 58-57  sa katapusang 3:55 sa aksiyon.

Apan mao na diay kadto ang katapusang salida sa Lancers gumikan kay sila si Gerald Fernadez ug Dyll Roncal milansang og lima sa walo nila ka free throws aron pagpaginahawa sa Cobras, 62-58 sa nahibiling 32.3 segundos sa duwa.

Nakasikit ang Lancers sa katapusang higayon, 60-62 gumikan kay si William Polican, human gi-foul ni UV star rookie Gabriel Cometa, kalmado kaayong mipasud sa duha niya ka   free throws aron pagsilyo sa kalampusan sa Cobras.

Si Red Cachuela maoy nangu sa Cobras uban ang 14 puntos, si Imperial mitali og 11, samtang sila si Roncal ug William Polican nagkumbinar og 24 puntos

Nangu sa Lancers maon si Coulibally uban ang 17 puntos, samtang sila si Sheldon Gahi ug Gileant Delator miiskor og 10 puntos matag usa.