Sir Juan (29)
“SA pabrika ka nagtatrabaho?” Tanong ni Nectar kay Mahinhin.
“Oo.’’
“Anong trabaho mo sa pabrika?’’
“Bookkeeper.’’
“Bookkeeper?” Sabi ni Nectar na halatang may pakla ang tono. “Talaga, bookkeeper?’’
“Oo, Nectar. Bakit?’’
“Ah wala. Kasi’y baka nagkakamali ako ng dinig.’’
Natahimik sila. Nagpatuloy si Mahinhin sa paglalaba. Nakatingin lamang si Nectar at parang ibig na mapatawa sa mga sinabi ni Mahinhin. Gusto nang sabihin ni Nectar na bistado na niya ito subalit nagpigil siya. Hahanap pa siya ng matibay na ebidensiya para hindi makapagkaila si Mahinhin. Ang lakas ng loob magsabi na sa pabrika nagtatrabaho at bookkeeper daw. Ha-ha-ha!
“Ikaw naman ang gumamit, Nectar, tapos na kasi ako.’’
“Ah hindi. Magpapalaba na lang ako sa labas. Hindi ko aaksayahin ang panahon sa paglalaba.’’
“Mabuti ka pa may ibabayad sa pagpapalaba. Ako kailangang kumayod para may maipang-tuition at kainin. Ang hirap magtrabaho at mag-aral.’’
“Mahirap bang trabaho sa pabrika?’’
“Oo, Nectar. Talagang mahirap.’’
“Hindi ba pasayaw-sayaw lang dun?’’
“Anong pasayaw-sayaw?’’
“Parang pakuya-kuyakoy lang.’’
“Ah hindi! Talagang walang puknat ang trabaho.’’
“Saan ba yung pabrika?’’
Hindi makasagot si Mahinhin. Bakit napakaraming tanong ni Nectar? Parang maraming hinahalukay.
“Ha e malapit lang dito.’’
“Puwedeng lakarin?’’
“Oo.’’
Nagtawa si Nectar. Nagtaka na naman si Mahinhin.
(Itutuloy)
- Latest
