Palaisipan

Sa ngayon ang bansa’y hindi mo malaman

kung makaaalis  sa kinaroroonan?

Mga dukha’t api sa loob ng bayan

magiging sagana hanggang kamatayan?

Makaahon kaya ang mga pulubi

maalis sa dusa at mga pighati?

Ang hangarin nilang buhay ay bumuti

ay tila malayong sa ngayo’y mangyari?

Ngayon ba’y may taong sa baya’y matapat

na di natatakot sa kulog at kidlat?

Kapag nagdaraan ang bagyo’t habagat

ay buo ang loob at di nasisindak?

Mga tao ngayong may hawak ng renda

ay namamayagpag at nagpapasasa;

Gayong milyun-milyon mga taong wala

hindi matulungan ng mga sagana?