Ang mayama’t dukha

Bakit ba ang ating dukhang mamamayan

hindi makaahon sa karalitaan?

Sino ba ang dito ay may kasalanan

siya kaya mismo o ang mayayaman?

Silang mahihirap ay mula sa wala

kaya nang isilang sila ay kawawa;

at ang mayayamang sa pera ay higa

isinilang silang sa yama’y sagana!

Kaya anong yaman ang inaasahan

nitong mga dukha na salat sa yaman?

Kung hindi kikilos nasa karukhaan

walang kakainin anak at magulang!

Hindi kumikilos taong masalapi

at ang mahihirap di kinakandili;

kung sila lang sana’y mabuting ugali

itong mga dukha ay may luwalhati!