Angkinin agad ang tagumpay

NOONG nakaraang taon ay first honor si Paul. Kung kailan nasa grade 6 ay saka bumaba ang rank niya, top 2 na lang sa first at second grading period. Pagsapit ng third grading, nabawi ni Paul ang kanyang trono at siya muli ang nag-top one. Kaya nang dumalaw sa bahay namin ang mag-ina, may pag-aalala si Paul nang mag-usisa ang aking anak:

“Kailan ang graduation ninyo?”

“March 28”

“Ikaw ba ang Valedictorian?”

“Wala pang announcement Kuya.”

“Bakit parang malungkot ka?”

“ Kasi sa third grading lang ako nag-top one. ‘Yung kalaban ko, top one ng first at second grading.”

“ Malay mo, ikaw ang top one ng last grading period. Tig-dalawang period kayo ng iyong kalaban. Isasama pa doon ang iyong mga extra-curricular activities. Di ba’t ang dami mong ipinanalong contest? Ilang contest ang ipinanalo ng iyong kalaban?”

“Wala. Laging talo”

“O, kita mo. Doon pa lang, nakakaungos ka na! Mara-ming beses mong pinasikat ang  inyong iskul sa buo ninyong probinsiya.”

Nang magpaalam ang mag-ina, niyakap ng aking anak si Paul, sabay sabing, “Congratulations sa Valedictorian”

“Kuya, hindi pa sure…” at bahagyang napatawa.

“Simula sa oras na ito, angkinin mo na ang pagiging Valedictorian. You’ll see, magkakatotoo ‘yun. Positive thinking lang.”

Tumango naman ang bata. Parang nakumbinsi siya ng aking anak.

Pagkaraan ng ilang araw, tumawag si Paul sa aking anak: “Kuya effective ‘yung itinuro mo…ako ang Valedictorian!”