Mahirap umibig

Ngayon ko natantong mahirap umibig

Sa isang nilikhang kapilas ng dibdib

Kung siya’y lumayo ay lubhang masakit;

Tulad nang nangyari sa aking pag-ibig!

Walang pinag-iba sa buhay ko ngayon

Laging hinahanap masayang panahon;

Sa mga nasapit na bayan at nayon

Sa ilog at batis na doo’y naglunoy!

Sa mabangong simoy at dampi ng hangin

Masayang gunita ang laging kapiling;

Sa maraming pook na aming narating

Hinahanap-hanap ang suyo at lambing

Kaya ang gunita ay nagpapatuloy

Hanggang sa masapit ang dako pa roon.

At pawang gunita siyang dumadaloy

Kaya pag-ibig lang ang muling sisibol!