Nagbago

Habang tumatanda ang ating daigdig

Tumatanda na rin ang buong paligid

Mga pook noo’y katulad ng langit

Sa tuwing mamasdan ng ating pangmasid!

Samantala ngayon saan man tumingin

Nakikita natin ay waring madilim

Kuryente at tubig parang iba na rin

Malabo ang ilaw, tubig ay maasim!

Pati kabihasnan ngayon ay kaiba

Dahil sa ang tao’y palaging masaya;

Mga mag-aaral banal ang adhika

Na sila’y matuto at maging dakila!

Subali’t sa ngayon pati kalikasan

Kahit tag-araw na laging umuulan

Ang ilog at kanal na dati’y languyan

Ay wala nang ganda pagka’t basurahan!