‘Akyat-bahay’

HABANG nasa kasagsagan ang pagdiriwang ngayong Pasko, doble-kayod naman ang mga kawatan.

Sinasamantala ang pagkakataon habang wala ang mga residente sa kanila-kanilang mga bahay. Hindi na magkandaugaga sa pagmamanman sa mga subdibisyon at sa mga bahay na alam nilang abandonado.

Inaasahan na kasing marami sa mga residente sa lungsod ang uuwi sa mga probinsya o hindi naman kaya bibisita sa kanilang mga kaanak sa mga karatig-lugar.

Sa mga aalis ng bahay ngayong bisperas ng Pasko, kuwidaw, baka maisahan at masalisihan kayo ng mga nagrorondang akyat-bahay.

Lingid sa inyong kaalaman, nakaposte na sila sa inyong bakuran.  At bago pa man kayo umalis, napag-aralan na nilang mabuti ang kanilang mga papasukan at lulusutan.

Maliban dito, saulado na rin nila ang galaw ng mga nakatira. Anong oras, umaalis at umuuwi.

Pangunahing target ng grupo ang mga bahay na walang tao sa mga komunidad partikular sa mga subdibisyon.

Sa anumang kadahilanan at mga pagpapanggap, nagagawa nilang makapasok at makalusot sa mga guwardya na nakatalaga sa mga gate.

Pinaalalahanan ang publiko, bago umalis ng bahay, tiyaking naka-lock ang lahat ng mga maaaring pasukan ng mga masasamang-loob at kawatan.

Mabuting ipagbilin din sa mga pinagkakatiwalaang kapitbahay ang inyong bahay lalo na kung mawawala kayo ng mga ilang araw.

Hindi dapat ipahalata sa mga kawatan na walang tao sa bahay upang hindi makatawag pansin sa kanilang maitim na balakin.