Tayo ay kumilos

Ang mabuhay ngayon sa mundong ibabaw

Malaking pagsubok sa kahi’t sinuman;

Ang mga bukirin na dapat matamnan

Dapat asikasuhin ng dukha’t mayaman!

Huwag nating iasa ang lahat sa Diyos

Kailangang tayo ang siyang kumilos;

Kung tayo’y pabaya sa paghihikahos

Ang kakamtan nati’y parusang mataos!

Mabilis kumilos ang taong mapera

Kaya pera nila’y malaking biyaya;

Ang mga mahirap na nakatunganga

Nakakamit nila ay buhay timawa!

Kaya tayong lahat ay dapat humakbang

Sa mabuting hangad na may pakinabang;

Kung tayo’y kunehong ang bilis ay yabang

Mabagal na pagong panalo sa laban!