Talo si Kamatayan?

Ang karit ni Kamatayan

iba ngayon ang may hawak

Ito’y hawak nang maraming

ang isipa’y lubhang hamak;

Sa maraming kapatagan

sila ngayon ay nagkalat

Ang iba ay nananahan

sa bundok at mga gubat!

Pero madalas ding

nasa paligid mo

Pagka’t sila’y mga taong

may isip-demonyo;

Hindi sila lumalayo

sila lamang ay narito

Katabi mo sa pagtulog

sila’y pawang kapatid mo!

Kaya di mo nakikita

karit nilang dala-dala

Pagka’t di mo iisiping

maitim ang kaluluwa;

Kaya ikaw Kamatayan

mag-ingat din sa kanila

Kung mabagal kang kumilos

una sila – talo ka na!