Ano ba ang misyon?

Hindi ko matiyak kung ano ang misyong

Sa aki’y tadhana nitong Panginoon?

Nang bata pa ako’y maraming ambisyon –

Maging abogado, engineer o doctor!

Habang nagtatagal sa mundong ibabaw

Maraming narating – iba’t ibang lugar

Dahil naging hilig magsulat na lamang

Talumpati’t tula sa album nahanay!

Pero kung nasunod ay ang aking ina

Ako ay magpari – baka Obispo na;

Pero nang makita ang mahal kong mutya

Kami ay nagtanan at nagpakasal pa!

May apat na anak ako ay nalibang

Kaya mga apo ang inalagaan;

Ngayo’y pitong apo ang hindi maiwan

Pagka’t silang lahat “tubo sa puhunan’’!