Halalan sa bansa

Ilang buwan na lang – halalan na naman

Mga kandidato’y haharap sa bayan;

Pero sino kaya ang dapat samahan –

Mayamang candidates o mahirap lamang?

Noon araw pa man at hanggang sa ngayon

Lahat ng candidates ay maraming datung;

At sa bansang ito ay naging tradisyon –

Mga walang pera’y talo sa eleks’yon!

At kung integridad ating hahanapin

Ngayon ay wala na tayong mapipisil;

Lahat nagsasabing sila’y magagaling

Kapag nagwagi na hanap ay taginting!

Taginting ng pera’t naglahong prinsipyo

Ang tiyak iiral sa mga panalo;

Mga maralita na nangagsiboto –

Ay balewala na’t tataguan nito!