Ako ay may puso

Ako ay may puso – pusong nagmamahal

Ng isang pag-ibig na walang kapantay;

Ang langit at lupa kanyang nasasaklaw

Sapagka’t ang Diyos ay aking patnubay!

At dito sa lupa itong pag-ibig ko

Hindi magmamaliw habang ako’y ako;

Kahit ang katawan ay ganap nang abo

Puso ko’y pipintig para lang sa ‘yo!

Sa iyong pagdalaw sa mga simbahan

Puso ko’y naroon sa harap ng altar;

Kahit sementeryo ang iyong puntahan

Sa lupa’t semento ang puso ko’y buhay!

At kung ang puso ko’y di na tumitibok

Sa lupang himlayan doon ay susulpot –

Ang isang bulaklak – ang kanyang talulot

Ay korte ng pusong sa iyo’y pag-irog!