P5.6 milyong gratuity pay sa siyudad sa naga gikwestyon

CEBU, Philippines — Gikuwestiyon sa Commission on Audit (COA) ang P5.613 milyon nga gratuity pay nga gihatag sa 814 ka Job Order (JO) ug Contract of Service (COS) personnel sa City Government sa Naga niadtong 2025 tungod sa kakulang sa mga dokumentong magpamatuod sa ilang makatagbaw nga serbisyo.

Sa 2025 audit report, miingon ang COA nga ang payroll nga gipirmahan sa mga benepisyaryo ug kinatibuk-ang sertipikasyon gikan sa Human Resource Development Office lamang ang gisumite, nga walay giaprobahang performance ratings o evaluation reports.

Lakip sa mga nakadawat ang 574 ka JO personnel nga nakadawat og P3.96 milyon, 99 ka school watchman nga P693,000, 65 ka teacher aide nga P440,000, 52 ka child development teacher nga P353,000, 23 ka COS personnel nga P160,000, ug usa ka Zumba instructor nga P7,000.

Gipunting usab sa COA nga adunay mga trabahante nga walay klarong iskedyul ug opisyal nga estasyon sa trabaho, samtang awtomatikong gilakip sa payroll ang mga adunay aktibong kontrata niadtong Disyembre 15, 2025, nga walay igong pagsusi sa ilang performance.

Ubos sa DBM Budget Circular No. 2025-4, ang kwalipikadong JO ug COS personnel mahimong makadawat og gratuity pay nga hangtud P7,000 kon nakaserbisyo sila og labing menos upat ka bulan ug epektibo pa ang ilang kontrata sa gitakdang petsa.

Girekomendar sa COA nga susihon pag-usab ang kwalipikasyon sa mga benepisyaryo ug kompletohon ang mga dokumento.

Bisan nagsumite ang siyudad og performance ratings niadtong Abril 16, 2026, miingon ang COA nga wala maklaro kon unsang rating ang katumbas sa “satisfactory service.”

Alang sa mga school watchman, endorsement gikan sa mga kapitan sa barangay alang sa pag-renew sa kontrata lamang ang gisumite.