Alom sa dughan, ilong, paa ug abaga

Dear Kuya Uriel,

Good A.M. Unsay meaning sa akong alom nga anaa sa akong dughan? Duha kini ka buok. Naa sab sa ilawom sa akong ilong, sa paa ug sa tuo nga abaga. Unya natawo sad ko sa Hunyo 28, 1977. -- 0919-2933609

TUBAG: Ang kahulogan sa imong alom sa dughan mao nga dali ka rang mobati og kaluoy ngadto sa imong isigkatawo ug mahalon nimo ang imong mga anak nianang pagmahal nga mao gayo’y angay ipabati ngadto kanila. Kanang alom sa imong ilong nagpasabot nga makabaton ikaw og katakos sa pagbuntog sa bisan unsang kakulian sa lawas. Kanang alom sa imong paa nagpasabot nga aduna ikaw talagsaong appeal nga dili daling maalinggatan. Ug kanang anaa sa imong tuo nga abaga nagpasabt nga may mabug-at nga kaakohan nga isangon kanimo. Bisan dili haom sa imong abilidad ang maong kaakohan apan imo gihapon kining matuman. Ang CHI nga mugna sa petsa sa imong pagkahimugso nagpasiugda og kinabuhi nga sama sa ligid, mailawom unya maibabaw na usab.

* * *

Dear Kuya Uriel,

Unsay meaning sa akong awom nga anaa ubos sa left side sa akong eyebrow, left side tunga sa ilok, right side sa agtang, left and right side ubos sa abaga ug sa left side sa akong bugan? Daghang salamat. -- 0927-3187968

TUBAG: Ang awom nga anaa sa ubos habig sa wala sa imong eyebrow nagpasabot nga ikaw dili kalimdan og sekreto. Mabutyag gayod diha kanimo ang mga tinagoan sa imong isigkatawo. Kanang awom sa tunga sa wala nimong ilok nagkahulogan nga maayo ka usab kaayong motipig og tinagoan. Dili ka usab maglisod sa panginabuhi. Kanang awom habig sa tuo sa imong agtang nagpasabot nga dili ka mosimpatiya sa mga buhat nga dautan. Dili ka gayod makalikay sa pagsaway niining maong buhat. Kanang awom sa ubos sa imong wala ug tuo nga abaga nagpasabot nga may katakos ka sa pagsugakod o pagsagubang sa mga gumonhap sa kinabuhi. Kanang awom sa imong bugan nagpasabot nga aduna ikaw sekreto nga dili gayod nimo ikatug-an bisan sa tawo nga labing suod kanimo.

* * *

EDITOR’S NOTE

Si Uriel Cruz Vallecera namatay na adtong miaging tuig. Kining iyang lindog nga “Banat Punsoy” nagpadayon pa tungod kay sa iyang pagtaliwan diha pay daghan niyang wa pa mapatik nga materials basi sa mga tawag sa telepono nga iyang nadawat. Alang sa kaangayan ngadto sa mga nanawag kaniya sa buhi pa siya nakahukom kami nga ipadayon ang lindog hangtud mapatik ang tanan.