Nagdamgo nga namatay

Dear Uriel,

Unsay buot ipasabot sa akong damgo nga namatay kuno ko pero di pa ko gustong mamatay. Nanghasi ko, akong gibuak tanan namong jars. Unya ang nakapahilak gyod nako mao kadtong migakos ko sa akong mama unya nangayo ko’g pasaylo sa akong nabuhat. Gipasaylo ko ni mama bisan pinangga kaayo niya ang iyang mga jars. Feel kaayo nako nga angay na gyod kong mobiya sa kalibotan. Mora gyod og gikumot ang akong kasingkasing mao nga pagmata nako naghilak ko. -- 0920-7050889

TUBAG: Ang imong damgo nagpasabot nga aduna ikaw suod nga higala o kabanay nga nakahimog sala kanimo ug gusto na kining mangayo sa imong pasaylo. Posible nga ang mao niyang kasal-anan wala pa nimo masayri kay natago kini sulod sa taas na kaayong kutay sa panahon. Andama ang imong kaugalingon sa paghatag sa imong pasaylo ngadto kaniya.

* * *

Dear Kuya Uriel,

Natawo ko sa January 22,1990. Buot kong mahibawo sa akong CHI. Daghan kaayong salamat. More power and God bless. -- 0916-7497379

TUBAG: Bitin ang imong horoscopic animal. Mahibulong ka tingali kun nganong mao kini ang imong horoscopic animal. Nia ang husay: Ang tuig sa bitin nagsugod sa Pebrero 6, 1989 ug natapos sa Enero 26, 1990. Tinuod nga kadaghanan sa natawo sa 1990 nakabaton og horoscopic animal nga kabayo. Apan lahi ka kay ang tuig sa kabayo diha na man nagsugod sa Enero 27, 1990 ug natapos sa Pebrero 14, 1991. Klaro kaayo ang petsa -- Enero 22 -- nga imong natawhan nahisakop pa sa petsa nga gidominahan sa bitin. Kasarangan nga kinabuhi ang imong masinati dinhi sa kalibotan. On and off ang buylo sa imong positive CHI. Dili ang tanan nimong pangandoy sa kinabuhi makabaton og katumanan. Dili sayon alang kanimo ang pag-asenso. Gamit kanunay sa kolor nga blue green, light yellow ug orange aron pagpalagsik sa imong CHI.

* * *

Dear Kuya Uriel,

I was born on March 19, 1989. Unsa man ang match nako nga bana. Thanks and God bless. More power to you. -- 0910-6598232

TUBAG: Natawo ka sa tuig sa bitin. Nahimugso ka sa petsa nga ang elementong yuta maoy essence of the day. Sa natad sa gugma, maoy perfect match alang kanimo ang opposite sex nga natawo sa tuig sa baka ug sunoy.

* * *

EDITOR’S NOTE: Si Uriel Cruz Vallecera namatay na adtong miaging tuig. Kining iyang lindog nga “Banat Punsoy” nagpadayon pa tungod kay sa iyang pagtaliwan diha pay daghan niyang wa pa mapatik nga materials basi sa mga tawag sa telepono nga iyang nadawat. Alang sa kaangayan ngadto sa mga nanawag kaniya sa buhi pa siya nakahukom kami nga ipadayon ang lindog hangtud mapatik ang tanan.