Parte sa mga awom

Dear Kuya Uriel,

Good day. Unsay ipasabot kun naay awom sa abaga? Thank you very much. Mag-wait ko sa imong tubag sa imong column. - 0921-6351309

TUBAG: Kasagaran sa nagbaton og awom sa abaga masangonan sa usa ka mahinungdanong responsibilidad, dili lamang sa iyang family circle kun dili sa komunidad usab nga iyang gipuy-an. Kun ang awom anaa mahimutang sa habig sa tuo nga abaga, nagpasabot kana nga ang nakabaton sa awom adunay potensiyal nga mahimong usa ka maayong lider. May impluwensiya siya. Makabaton og daghang sumusunod. Dako ang purohan nga mahimo siyang popular sa katilingban nga iyang gipuy-an ug ingon man sa iyang field of endeavor. Kun ang awom nagtungtong gayod sa abaga, nagpasabot kini og kalit-kalit nga kausaban sa dagan sa panahon alang sa nagbaton sa maong awom. Ang angay niyang pangandaman mao ang pagbanos sa kasakit human sa hamubong kalipay. Posible sab nga siya’y mahimong tinubdan o hinungdan sa pag-antos ug kasakit nga mahiagoman sa uban.

* * *

Dear Kuya Uriel,

Hi...! Naa koy awom sa tiil, sa right side. Unsay kahulogan niini? Thanks a lot and God bless. More power. - 0928-2075634

TUBAG: Ang imong awom nagkahulogan nga pinaagi sa pagsuroy ikaw mabuhi. Espisipikong gitumbok niini ang pagka-travelling sales representative nga maoy labing haom nga trabaho alang nimo. Hinuon, angay magbantay ug magnaong ang nagbaton sa maong awom kay nagkahulogan usab kini og pagka iresponsable. Posibleng pasagdan niya ang iyang pamilya kun may makatental kaniya sa paglatagaw sa lainlaing mga dapit. Nagpasabot usab kini og pagka-selfish. Ang paglulinghayaw maoy iyang kalipay. Aduna unta siya’y creativity nga magamit niya pagbugtaw sa tingusbawan. Pero tungod sa iyang kapul-anon sa trabaho, dili siya makalahutay. Dili mo-prosper. Unya, kun moabot na ang iyang pangedaron og 50, anha pa siya makaamgo sa iyang pagpabaya. Lagmit maikag siya sa pagsagop sa pamatigayon alang sa iyang kabuhian. Kun may kaalam sa musika, posibleng kini makatabang sa iyang pagkab-ot sa kalamposan sa pagbugtaw sa ginamithing tingusbawan sa kinabuhi.

* * *

Dear Kuya Uriel,

Good day. This is Maricor of Naga City, Cebu. I want to know the meaning sa akong mole beside my nose. Thank you very much. More power to you and your column. God bless. -- 0909-6366462

TUBAG: Ang imong awom, Maricor, nagpasabot nga nagbaton kag gaan nga kabubut-on ngadto sa imong isigkatawo, labina gyod ngadto sa imong mga kabanay. Ang pagsimba maoy buhat nga angay mong sagopon ug buhaton. Si Bathala maoy numero uno sa imong kinabuhi ug sunod ang imong mga ginikanan. Dugang kahulogan sa maong awom mao nga ang hilig sa pagsunod sa fashion sa panahon dili mo kalikayan. May gugma sa mga pahiyas, mga bulak, pahumot ug ubang mga kapritso. Posible sab nga maayo kang maniid sa kalihokan ug sekreto sa uban. Bisan dili nimo tuyoon apan makasagop ka gayod og bisan unsang impormasyon nga, bisan trivia kini alang sa uban apan makalingaw sa mga tawo sa imong palibot. May kaabtik ka nga dili malimbongan sa dakong kasayon. Apan kun bahin na gani sa pagpakigrelasyon sa opposite sex, posibleng madiskobre ang imong kahuyang.

* * *

Dear Kuya Uriel,

Hello and good day. Naa koy ipangutana nimo bahin sa akong awom sa tunga sa ilong. Unsay buot ipasabot niini? Thanks. -- 0915-5074087

TUBAG: Wala man nimo iklaro kun unsay buot mong ipasabot sa imong pag-ingon nga "tunga sa ilong." Gisabot ko nalang kini nga ang awom nagtungtong sa imong ilong. Nagpasabot kini nga mahigalaon ka. May taas nga panglantaw sa kinabuhi. May pangandoy ka nga gusto mong makabaton og katumanan. Dili ka kontento sa imong pagkabutang ug gusto mong makabaton og tingusbawan aron makasinati og kausaban ang imong kinabuhi. Usahay kainitan ka sa mga masinahon. Mapaubsanon ug maaghop ka. Kadali ka rang makakita og mga oportunidad nga posibleng maghatag nimo’g kabulahanan. Dili idlas kanimo ang kalamposan. Hinuon, bulnerable ka sa mga pagsulay ug kalisdanan.

* * *

(Kun aduna kamo’y buot pakisayran bahin sa punsoy, kahulogan sa awom, damgo ug uban pa, text sa 0910-8105522).