93 eksplosibo nadiskubre sa junkshop sa Sulu

COTABATO CITY, Philippines — Nasa 93 na eksplosibo na hindi pa napapaputok kabilang ang isang 500 pound vintage bomb ang nadiskubre ng mga awtoridad sa isang junkshop sa Jolo, Sulu, kamakalawa.

Sa ulat, nakakolekta ang mga ordinance experts ng Philippine Coast Guard (PCG) na nakabase sa Sulu ng nasa 93 na eksplosibo na natagpuang nakaimbak sa isang junkyard sa ikinasang operasyon sa Barangay Alat, Jolo nitong Lunes.

Kabilang sa mga nadiskubreng eksplosibo ay mga cannon, mortar shells, fuzes at grenade projectiles, at ang 500-pound World War 2 bomb tulad ng mga ibinabagsak na bomba sa kalupaan mula sa himpapawid.

Sinabi kahapon sa mga mamamahayag ni Army Major Gen. Jose Vladimir Cagara, acting commander ng Western Mindanao Command na nakabase sa Zamboanga City, na  ang matagumpay na ordnance disposal operation ng Sulu-based PCG members, katuwang ang militar at pulisya sa lalawigan ay dahil na rin sa tips ng mga residente ng Barangay Alat hinggil sa napaka-delikadong presensya ng mga kinakalawang na bomba sa nasabing junkyard. 

Ang may-ari ng junk shop na bumibili ng mga metal scraps at iba pang recyclable wastes ay sumasailalim na sa imbestigasyon ng mga police investigators at personnel ng Army intelligence units matapos na madiskubre sa kanyang puwesto ang mga eksplosibo. Nakatakda namang i-dispose o sirain ng mga awtoridad ang mga natagpuang unexploded ordnance (UXO).