PCG: Tanker, nasunog; 2 tripulante sugatan

MANILA, Philippines — Dalawang tripulante ang sugatan nang sumiklab ang isang sunog sa isang tanker sa Calaca City, Batangas kamakalawa.

Ayon sa Philippine Coast Guard (PCG), ang Motor Tanker (MTKR) “GINDARA” ay may lulang mga molasses o pulot nang masunog sa Balayan Distillery Inc. Port, sa Brgy. Talisay, Calaca City.

Kaagad rumesponde ang mga awtoridad upang apulain ang apoy nang makatanggap ng ulat hinggil sa sunog na sinasabing nagsimula sa engine room ng barko.

Nabatid na 22 ang mga tripulanteng lulan ng barko ngunit pawang ligtas ang 20 sa kanila.

Masusi ang imbestigasyon ng mga awtoridad upang matukoy ang pinagmulan ng sunog.