Kelot tinangay sa ilog, dedo
SARIAYA, QUEZON, Philippines — Patay ang isang 47 anyos na lalaki matapos na tangayin nang malakas na agos ng ilog habang lumalangoy patungo sa kabilang pampang upang iligtas ang kanyang mga alagang hayop sa Barangay Sampaloc 2 sa bayang ito, kamakalawa.
Kinilala ng pulisya ang biktima na si Armando Albitos, residente ng Purok 7, Barangay Sampaloc Bogon, Sariaya.
Batay sa imbestigasyon, umalis ang biktima sa kanilang bahay bandang alas-4:00 ng hapon upang puntahan at iligtas ang kanyang mga alagang baka na nasa kabilang bahagi ng ilog.
Hindi na umano nakauwi ang biktima at kalaunan ay natagpuan sa ilog ng Barangay Sampaloc 2, na pinaniniwalaang tinangay nang malakas na agos habang tumatawid sa pamamagitan ng paglangoy.
Dinala ang labi ng biktima sa Funeral Parlor sa Barangay Sampaloc 2 habang nagpapatuloy ang imbestigasyon sa insidente.
- Latest
