Babaeng amo inutas ng caretaker!
Sahod kinaltasan
MANILA, Philippines — Dahil lamang umano sa pagtatalo sa suweldo, pinagbabaril ang isang 32-anyos na ginang ng kaniyang caretaker sa Brgy. Pinagkawitan, Lipa City, Batangas nitong Lunes ng gabi, ayon sa ulat kahapon.
Kinilala ang nasawing biktima na si Rhenz Elieth Barette Bruzon, nagtamo ng mga tama ng bala sa katawan na siya nitong ikinamatay.
Nakilala naman ang suspect na katiwala ng ginang sa pag-aari nitong bahay sa pangalang Leo, 42-anyos, na nahaharap sa kasong homicide.
Sa imbestigasyon, kinompronta ng katiwala ang amo dahil sa maliit umano nitong suweldo na kinaltasan pa dahil sa kaniyang pagliban sa trabaho sa kabila ng may mabigat naman siyang dahilan sa isyu ng kaniyang pamilya.
Dito na nagkaroon ng pagtatalo sa pagitan ng among babae at katiwala hanggang sa kumuha umano ng martilyo ang amo at pinukpok nito ang huli na tinamaan sa katawan.
Sa matinding galit ay kinuha naman ng caretaker ang baril na pag-aari ng asawa ng ginang at pinagbabaril ang amo.
Nagawa pang maisugod sa pagamutan ang biktima, pero idineklarang dead-on-arrival.
Nasakote ng mga awtoridad ang suspect sa follow-up operation at nakumpiska rito ang isang cal. 45 pistol na may dalawang magazine at mga bala.
- Latest
