Sharon naimbyerna sa isyu

CEBU, Philippines — Mialma ang Megastar nga si Sharon Cuneta sa paggamit sa litrato nila sa iyang pamilya nga gipakita atol sa press conference sa giingong “maleta boys”  niadtong Martes .

Dunay  mga litrato ni  Sharon uban sa iyang pamilya, lakip ang iyang bana nga si Senador Kiko Pangilinan, apan wala’y dugang detalye nga gihatag mahitungod sa konteksto sa maong litrato.

Pinaagi sa usa ka Facebook post, gihimakak ni Sharon ang pagkalambigit nila sa  isyu sa  maleta. Matud pa niya, ang maong hulagway kay kuha sa  pagbisita sa iyang pamilya sa Marawi ug  usa lamang ka pasalamat ngadto sa mga lokal nga opisyal  tungod sa suporta nga ilang gihatag sa kampanya ngadto  sa iyang bana  atol sa 2025 senatorial elections.

“Mga sinungaling!!!!!!! Sobra talaga kayo!!!!! I vlogged about this visit, my family and I made to Marawi to thank the Governor, Mayor, and other officials and their families for their support for Kiko,” tipik sa post ni Sharon

Midugang pa siya og pangutana batok sa mga alegasyon: “Talaga ba, magbibigay kayo ng maleta sa amin sa Marawi pa???!!!”. Gitataw  usab sa aktres nga ang ilang kahimtang karon  kay bunga sa ilang paningkamot ug matinud-anong pagtrabaho.

 “Hindi kami tulad ninyong mga sinungaling! kaya sabi nga nila, kapatid ng sinungaling ang magnanakaw! bahala na ang Panginoong Diyos sa inyo,” dugang pa niya.

Sa pagkakaron, wala pa’y opisyal nga ebidensiya nga gipresentar nga direktang naglambigit kang Sharon ug Senador  Pangilinan sa mga alegasyon nga ilang gisagobang.

Bea ug Vincent nagbulag

Gikatahong gitak-opan na nila   Bea Alonzo ug Vincent Co ang ilang relasyon. Mao kini ang nasagap nga taho sa PEP gikan sa  ilang  mga tinubdan.  `Una na nga nigawas ang taho kaniadto nga  wala madayon ang ilang   kasal niadtong Mayo gumikan sa kakulian kun diin nitumaw ang mga pagduda nga posibleng nag-ugat kini sa prenup agreement.

Emosyonal sa premiere night

Gihangop sa viewers ang pelikulang Home Along Da Riles: Da Reunion . Emosyonal ang mga bitoon niini atol sa grand premiere sa maong pelikula sa usa sa mga sinehan  didto sa kaulohan sa niaging gabii. Gibidahan kini nila   Nova Villa, Claudine Barretto, Vandolph, Boy 2 Quizon, Smokey Manaloto, Gio Alvarez, Maybelyn dela Cruz, Dang Cruz, Cita Astals, ug uban pa.

Dili madutlan

Dili manumbaling si  Klea Pineda sa ipanulti sa ubang tawo kalabot sa relasyon nila ni  Janella Salvador. "Maaaring iba ang nakikita nila, pero ikaw pa rin ang paborito ng mga mata ko. Sila? Bahala sila. Basta ako? Napapahanga mo ako,” suma pa ni Klea. 

‘Heart World’ Season 2, manamilit na!

Manamilit na sa viewers  ang reality show nga “Heart World” Season 2 ni Heart Evangelista ug ang katapusang  episode  ninii kay i-ere karong Sabado, Hunyo 20 sa GMA Network.

Sa finale episode, hisgotan og balik  ni Heart ug sa iyang team ang dili nila malimtan nga mga   kasinatian sa  tibuok season. Lakip niini ang iyang mga biyahe sa nagkalain-laing nasud, pag-apil sa mga prestihiyosong kalihokan sa kalibutan sa fashion, ug ang mga espesyal nga higayon uban sa iyang pamilya ug mga minahal sa kinabuhi.

Sa maong episode, ipaila-ila usab  ni Heart ang iyang  bag-ong proyekto nga “The People Have Spoken,” diin mosulod siya sa  labing  una niya nga  kasinatian isip host sa usa ka game show.

Trisha Denise, dunay bag-ong single nga "di minamadali”

Gipabuhagay sa singer-songwriter nga si Trisha Denise ang mas lawom nga paglambo sa gugma pinaagi sa iyang bag-ong single nga “‘Di Minamadali,” diin kauban kauban niya sila Thyro Alfaro ug Soc Villanueva.

Ang  maong soul-R&B nga awit  kay gisulat nila Trisha, Thyro, ug Soc ug naghulagway sa kalipay ug kahinam nga mabati kun adunay espesyal nga tawo sa iyang kinabuhi, samtang gipabiling bililhon ang matag hugna sa usa ka relasyon.

Nagsugod si Trisha Denise sa pagsulat og mga kanta sa edad nga 11 anyos. Sa paglabay sa panahon, nakahimo siya og mga awit alang sa daghang artists sa ABS-CBN Music, lakip na  sila Regine Velasquez-Alcasid, Pops Fernandez, Belle Mariano, ug Janella Salvador, ingon man sa mga grupo nga BINI ug BGYO.

Niadtong 2021, iyang gi-release ang iyang debut album nga Piece of the Puzzle, nga gisundan sa EP nga Simula ng Wakas. Sa niaging tuig, nakigkolaborasyon usab siya kang Belle Mariano ug Cesca alang sa friendship anthem nga  “Wala? Nandiyan”  ug gi-release ang kantang  “Bakit Naman Hindi?” isip kabahin sa soundtrack sa It’s Okay Not to Be Okay.

Madungog ang bag-ong single nga “‘Di Minamadali” nila Trisha Denise, Thyro , ug Soc sa nagkadaiyang digital streaming platforms.

Angeline migradwar sa kolehiyo

Dugang  kalamposan sa kinabuhi ang naangkon sa singer nga si  Angeline Quinto human siya  nigradwar sa  kolehiyo sa niaging adlaw.

Nahuman niya ang  kursong Bachelor of Science in Business Administration major in Marketing Management sa Immaculada Concepcion College sa Caloocan.

Kahinumdoman nga sa nangaging interview , atol sa iyang contract signing sa  One Music PH ug Star Music, gibutyag ni Angeline  nga gitago niya ang iyang pag-eskwela gikan sa iyang pamilya ug bana aron mahimo kining usa ka espesyal nga surpresa alang kanila.

“Hindi alam ng family ko and asawa ko… Ang pagtupad ng pangarap walang pinipiling edad. Kahit wala na si Mama Bob, itinuloy ko pa rin ang pangarap,” suma pa sa  singer.