7 ‘wanted’ sa Quezon nalambat

CAMP NAKAR, Lucena City, Philippines — Dahil sa maigting na kampanya ng Quezon Police Provincial Office (QPPO) sa mga wanted sa batas, naaresto ang pitong katao kabilang ang isang Regional Level wanted person matapos ang sunud-sunod na manhunt operations na isinagawa sa iba’t ibang bahagi ng lalawigan, kamakalawa.

Batay sa ulat ni QPPO Director PCol. Romulo Albacea, nadakip ng Provincial Intelligence Unit (PIU) ang Regional Level wanted­ person na si alyas “Dalma” na nahaharap sa kasong Murder samantalang naaresto ng Pitogo Police si alyas “Jubi” dahil sa paglabag sa Republic Act No. 9262 o Violence Against Women and Their Children Act.

Nagsagawa rin ng matagumpay na operasyon ang 1st Quezon Provincial Mobile Force Company na nagresulta sa pagkakaaresto kina alyas “Len “ para sa kasong Arson at alyas “Larvin” dahil sa kasong Illegal Gambling.

Naaresto naman ng Real MPS si alyas “Darrel” dahil sa kasong Illegal Gambling habang nadakip naman ng Infanta Police si alyas ­“Doming” dahil sa paglabag sa RA 10964.

Samantala, inaresto ng Patnanungan Policw si alyas “Wik” na nahaharap sa kasong attempted homicide.