Nobyo hinataw ng baseball bat ng karibal, patay!
Nabistong iisa ang kanilang nobya
MANILA, Philippines — Pinaniniwalaang “love triangle” ang motibo sa pamamaslang sa isang 44-anyos na lalaki na pinaghahampas ng baseball bat nang hinihinalang “karibal” sa iisang babae na kanilang sinisinta sa malagim na insidente sa San Carlos City, Pangasinan kamakailan.
Sa report ng San Carlos City Police, ang biktima ay duguang bumulagta at agad na nasawi sa insidente matapos na magkaroon ng internal hemorrhage partikular na sa bahagi ng ulo sa tinamong hampas ng baseball bat sa mga hataw ng kaagaw nito sa pag-ibig.
Ang bangkay ng biktima ay natagpuan sa bypass road sa Brgy. Kaingal ng lungsod noong Sabado ng hatinggabi at narekober din ng mga awtoridad ang baseball bat na may bahid pa ng dugo na ginamit sa krimen.
Arestado naman ang 22-anyos na suspect na kinilala lamang sa alyas na “Batotoy” ay residente rin ng nasabing Barangay sa siyudad na ito na itinuro ng mga nakasaksi sa pangyayari.
Base sa imbestigasyon, ang suspect at ang biktima ay kapwa umano boyfriend ng babaeng kapwa nila pinag-aagawan.
Bago ang krimen, nagkausap pa sa cellphone ang suspect at biktima na nag-aaway sa babaeng pareho umano nilang nobya hanggang sa magbantaan pa ang magkaribal sa kanilang buhay. Nang umalis ng bahay ang biktima, inabangan pala siya ng suspect at pinaghahampas ng baseball bat sa ulo nito na siya nitong ikinasawi.
Sa pagsisiyasat ng pulisya, selos ang pangunahing motibo ng krimen.
- Latest
