4 tinedyer tumiwarik sa carnival ride, sugatan
Nagkulitan sa pag-selfie…
MANILA, Philippines — Dahilan sa pagse-selfie, sugatan ang apat na tinedyer makaraan ang mga ito ay mahulog sa carnival ride sa ginaganap na okasyon sa Bilar, Bohol kamakalawa ng gabi.
Sa report ng Bohol Police, nangyari ang insidente sa nasabing bayan habang lulan ang biktima ng ‘Spongebob ride’ dakong alas-10:30 ng gabi.
Base sa imbestigasyon, habang tumatakbo ang ‘Spongebob,’ isa sa mga panghalinang ride sa okasyon sa nasabing bayan ay nagtayuan ang mga tinedyer na nagkukulitan sa pagse-selfie. Ayon sa pulisya, bunga nito ay nawalan ng balanse ang nasabing mga tinedyer habang mabilis ang takbo ng sinasakyan ng mga ito.
Bunsod nito ay tumilapon ang mga tinedyer na ikinasugat ng mga ito bunga ng nangyaring insidente.
Isinugod naman sa pagamutan ang mga tinedyer para malapatan ng lunas sa tinamong mga sugat at galos sa katawan bunga ng insidente. Samantalang sinagot naman ng carnival ride operator ang gastusin ng mga biktima sa hospital.
Patuloy ang imbestigasyon sa kasong ito at inaalam na rin ang pananagutan ng carnival owner at operator sa pagkasugat ng mga biktima.
- Latest
