Pulis utas, 4 pa sugatan sa shootout!

Warrant ops vs ‘wanted’

MANILA, Philippines — Isang miyembro ng PNP-Special Action Force (SAF) ang patay habang apat pang kabaro ang sugatan nang mauwi sa shootout ang warrant operation laban sa isang lalaking wanted sa  kasong murder sa Brgy. Lumbak, Buadipuso-Buntong, Lanao del Sur nitong Lunes ng umaga.

Sa ulat, sinabi ni P/Captain Steffi Salanguit, Spokesman ng Police Regional Office-Bangsamoro Autonomous Region (PRO-BAR) dakong alas-11 ng umaga nang mangyari ang insidente.

Habang isinisilbi ng mga pulis sa pamumuno nina P/Captain Nur Basher Cayda, hepe ng Buadipuso-Buntong at Lt. Mubarrak Dimakuta ng SAF 41st Special Action Company, Police 4th Special Action Battalion ang warrant of arrest laban kay  Sukair Diongcat na wanted sa kasong murder at attempted murder sa kanyang hinihinalang hideout nang salubungin sila ng mga putok ng assault rifles mula sa mga armadong suspect.

Ang insidente ay nauwi sa ilang minutong palitan ng putok sa pagitan ng mga awtoridad at ng grupo ni Diongcat na ikinasugat ng limang na pulis.

Bunga nito, nagsagawa ng reinforcement ang  SAF dala ang mga armored personnel ­carriers sa lugar.

Ang mga nasugatang pulis ay mabilis na isinugod sa pagamutan sa Marawi City para malapatan ng pangunahing lunas pero isa sa kanila ang binawian ng buhay habang ginagamot.

Tinutugis na ang mga suspek na posibleng may mga sugatan din sa kanilang panig.