Hepe, 10 opisyal sibak sa jueteng
MANILA, Philippines — Sinibak sa puwesto ang hepe ng pulisya ng Pangasinan na si Col. Arbel Castro Mercullo at 10 iba pang opisyal dahil sa naglipanang jueteng operations sa lalawigan. Sinibak sa puwesto ang 11 opisyal ng Pangasinan Provincial Police Office matapos mabunyag ng National Bureau of Investigation (NBI) ang malawakang operasyon ng ilegal na jueteng sa lalawigan. Sa inilabas na kautusan ni Philippine National Police (PNP) Chief PGen. Jose Melencio C. Nartatez, Jr., kabilang sa mga inalis sa puwesto ang isang police colonel, limang lieutenant colonel, tatlong major, at dalawang kapitan. Inilipat sila sa Police Holding and Accounting Unit (PHAU) at Directorate for Personnel and Records Management (DPRM) ng Police Regional Office 1.
Nag-ugat ang serye ng operasyon kontra ilegal na sugal na nagresulta sa mga pag-aresto: 49 sa San Carlos City; 40 sa Rosales; 34 sa Calasiao; 31 sa Urdaneta City; at 25 sa Manaoag. Dinala ang mga suspek sa kustodiya ng pulisya at inilipat sa holding facility sa Camp Crame habang nagpapatuloy ang imbestigasyon. Anim ding PNP opisyal ang isinailalim sa balasahan kasunod ng general orders na pirmado ni outgoing director for Personnel and Records Management (DPRM), PMGen. Constancio Chinayog.
Mula sa Police Regional Office - Bangsamoro Autonomous Region (PRO-BAR), tinalaga si PBGen. Jaysen de Guzman bilang acting director for Personnel and Records Management (DPRM) kapalit ni Chinayog. Itinalaga bilang acting director ng Headquarters Support Service (HSS) si PBGen. Manuel Abrugena habang si PBGen. Christopher Abecia ang ipinuwesto bilang acting regional director (DRDA) ng PRO-BAR. Pamumunuan si PBGen. Antonio Marallag Jr. na galing sa Police Regional Office 2 ang Directorate for Research and Development. Papalit kay Marallag si PBGen. Mariano Rodriguez bilang acting director ng Police Regional Office 2 habang inilipat bilang acting director ng Police Regional Office 11 si PCol. Harry Buenaventura.
- Latest
