Trak nag-dive sa dagat, driver sugatan

MASBATE CITY, Masbate, Philippines — Sugatan ang isang driver matapos na mawalan ng kontrol at mahulog ang kanyang minamanehong trak sa dagat ng Masbate City Port sa nasabing lungsod kamakalawa ng umaga.

Nagpapagaling at nasa mabuti nang kalagayan ang drayber na kinilalang si alyas “Joseph”.

Pinagtulungan namang iangat sa pamamagitan ng crane ng mga tauhan ng Port Management Office, Philippine Coast Guard at divers ang Isuzu Elf Truck sa dagat hanggang sa Ito ay maiahon.

Sa ulat, ipinoposisyon umano ni Joseph papasok sa barkong MV Angel Heart ang trak na kargado ng mga pangargang produkto upang dalhin sa Lagundi, Ticao Island ng naturang lalawigan. Gayunman, nawalan ng preno at hindi na nakontrol ang takbo nito na tuluyang nahulog sa dagat.