20 nalason ng tulingan sa Iloilo

MANILA, Philippines — Dalawampu pang katao ang naratay sa pagamutan matapos na umano’y malason sa iniulat na isdang tulingan sa lalawigan ng Iloilo, ayon sa ulat kahapon.

Sa ulat na tinanggap ng Office of Civil Defense (OCD) Region VI, anim sa mga naitalang kaso ay mula sa Passi City; tig-3 namang indibidwal ay mula sa mga bayan ng Balasan Banate, Dumangas at San Enrique; habang tig-isa naman sa mga bayan ng Mina, at Dueñas.

Ang mga biktima ay patuloy na nilalapatan ng lunas sa pagamutan habang ilan naman sa mga ito ang nakauwi na sa kanilang tahanan.

Pinayuhan naman ni Dr. Maria Socorro Colmenares-Quiñon, Chief ng Iloilo Provincial Health Office ang mga netizens na iwasan ang pagkain ng tulingan habang hinihintay pa ang confirmatory test kung ito nga ang nakalason sa mga biktima.

Nabatid na ang tulingan ay nakalalason na tinatawag na scombroid o mataas na level ng histamine kung hindi maayos ang preserbasyon nito matapos na mahuli.