Konsehal, itinumba ng 2 armado

MANILA, Philippines — Pinagbabaril nang malapitan at napaslang ang isang municipal councilor ng dalawang mga armadong kalalakihan sa naganap na karahasan sa huling araw ng Ramadan sa bayan ng Paglat, Maguindanao del Sur nitong Miyerkules.

Sa ulat ni Police Regional Office-Bangsamoro Autonomous Region (PRO-BAR) Director P/Brig. Gen. Jaysen de Guzman, kinilala ang nasawing biktima na si Samuan Kitalok, konsehal sa bayan ng Paglat. 

Sa isang press statement kinondena naman ng PRO-BAR ang insidente kasabay ng paniniyak na bibigyan ng hustisya ang sinapit ng biktima. 

“This heinous act is a grave violation of the law and a direct affront to the dignity and safety of public officials and the communities they serve. PRO BAR remains steadfast in its commitment to protect our communities and ensure that no act of violence goes unpunished,” saad ni de Guzman.

Batay sa imbestigasyon, pinagbabaril ng mga armadong salarin ang biktima sa harapan ng tahanan nito sa Brgy. Poblacion, Paglat ng lalawigang ito nitong Miyerkules .

Matapos ang insidente ay mabilis na tumakas ang mga salarin na sinamantala ang pagkakagulo ng mga tao sa lugar pagkaraang duguang bumulagta ang biktima na dead on the spot sa insidente.

Narekober naman ng mga awtoridad sa crime scene ang mga basyo ng bala ng hindi pa natukoy na kalibre ng armas.

Kasalukuyan pang iniimbestigahan ng pulisya ang motibo ng krimen upang matukoy at masakote ang mga salarin.