Kinder nasapol ng bala sa klasrum, todas

COTABATO CITY – Isang kinder pupil ang nasawi nang tamaan ng ligaw na bala habang nasa loob ng silid-aralan ng Damabalas Elementary School, Datu Piang, Maguindanao del Sur, naganap nitong Miyerkules ng umaga.

Kinilala ang nasawing biktima na si Farhadin Ludtia, 5-anyos, kinder pupil, residente ng kalapit na bayan ng Datu Salibo.

Sa salaysay ng school principal na nakikinig sa kanyang class adviser ang biktima nang biglang nabuwal at dumugo ang ulo ng tamaan ng ligaw na bala na posibleng mula sa Barangay Olandang na noon ay may naglalaban na dalawang grupong Moro.

Dinig na dinig sa Barangay Damabalas kung saan naroon ang paaralang pinapasukan ng nasawing si Ludtia ang palitan ng putok ng mga magkalabang pamilyang Moro sa Barangay Olandang sa bagong tatag na bayan ng Nabalawag na sakop ng Bangsamoro Region, ngunit nasa probinsya ng Cotabato sa sakop ng Region 12.