Bus driver binaril sa ulo ng pasahero, todas!
MANILA, Philippines — Patay ang isang driver ng pampasaherong bus nang barilin sa ulo ng nagpanggap na pasahero, habang namamasada sa Antipolo City nitong Biyernes ng madaling araw.
Kinilala ng Antipolo Component City Police Station (CCPS) ang biktima na si “Jefferson”, nasa hustong gulang, at residente ng Barangay Bagong Nayon, Antipolo City.
Tumakas ang gunman matapos sumakay sa motorsiklong minamaneho ng isa pang lalaking nakasuot din ng itim na jacket na may hoodie.
Naganap ang krimen dakong alas-2:50 ng madaling araw sa kahabaan ng Marcos Highway, malapit sa Kanto Padilla, sa Barangay San Isidro, Antipolo City.
Sa imbestigasyon, pumara ang gunman at sa pag-akyat sa bus ay nagtanong kung magkano ang pamasahe hanggang Cubao.
Nang sagutin ng driver na “P88.00” ay mabilis na bumunot ng baril ang suspek at walang sabi-sabing pinaputukan sa ulo ang driver.
Matapos ang pamamaril ay dali-daling bumaba ng bus ang gunman at sumakay umano sa naghihintay na kasabwat na nagmamaneho ng get-away motorcycle.
Patuloy ang imbestigasyon para matukoy at madakip ang mga suspek at matukoy ang motibo sa pamamaslang.
- Latest
