Notoryus na ‘tulak’ arestado sa Quezon

CAMP NAKAR, Lucena City , Philippines — Aabot sa ?1.3 milyong halaga ng hinihinalang shabu at isang ‘di lisensyadong baril ang nasamsam ng pulisya mula sa isang High Value Individual (HVI) sa isinagawang search warrant operation sa Sitio Matungao, Barangay Madulao, Catanauan, Quezon, ka­makalawa ng umaga.

Base sa ulat na nakarating kay Quezon Police Provincial Office (QPPO) PCol. Romulo Albacea, kinilala ang suspek sa alyas na “Boyet”, 40, may-asawa at residente sa naturang lugar.

Ayon sa ulat, nakumpiska mula sa suspek ang humigit-kumulang 197 gramo ng hinihinalang ipinagbabawal na gamot, isang caliber .22 revolver, mga bala, at mahigit ?51,000 cash na pinaniniwalaang mula sa iligal na gawain.

Isinagawa ang operasyon ng QPDEU dakong alas-7:40 ng umaga katuwang ang iba pang unit ng pulisya sa bisa ng search warrant na inisyu ng Regional Trial Court sa Lucena City.

Nasa kustodya na ng Catanauan Municipal Police Station ang suspek at nahaharap sa mga kasong paglabag sa Republic Act 9165.