Egyptian school admin itinumba sa Zamboanga!

COTABATO CITY, Philippines — Patay ang isang Egyptian national na opisyal ng isang pribadong paaralan nang barilin ng hindi pa kilalang salarin sa Zamboanga City nitong gabi ng Sabado.

Kinumpirma ng mga local executives at ng tanggapan ni Police Brigadier General Edwin Quilates, director ng Police Regional Office-9, ang pagkamatay ng biktima na kinilalang si Abdalrahman Elshawadfy Mohammed Elfaky, residente ng Matina Aplaya, Davao City.

Si Elfaky ay administrator ng Asia Academic School sa Barangay Tetuan ng naturang lungsod.

Sa inisyal na imbestigasyon ng Zamboanga City Police, minamaneho ni Elfaky ang kanyang kulay grey na Toyota Innova nang dikitan at tambangan ng armadong riding-in-tandem suspect pagsapit nito sa hangganan ng dalawang barangay sa Zamboanga City, ang magkalapit na Lumbangan at Divisoria, parehong residential area sa lungsod.

Patungo si Elfaky sa isang lugar sa Lumbangan nang tambangan ng mga ‘di kilalang suspek na mabilis na tumakas patungo sa ‘di batid na direksyon.