Voter registration sa Eastern Visayas, sinuspinde ng Comelec
MANILA, Philippines — Pansamantalang sinuspinde ng Commission on Elections (Comelec) ang voter registration para sa 2026 Barangay and Sangguniang Kabataan Elections (BSKE) na isinasagawa nila sa Eastern Visayas, bunsod nang pananalasa ng bagyong Tino sa rehiyon.
Ayon kay Comelec Chairman George Erwin Garcia, una nilang sinuspinde ang voter registration sa Tacloban City ngunit malaunan ay nagpasya silang suspindihin na rin ito sa buong Region VIII.
Sa ngayon aniya ay nagsasagawa na ang mga local poll offices ng imbentaryo at nag-iinspeksiyon upang matukoy kung may mga nasirang kagamitan ang Comelec sa lugar dahil sa bagyo.
Paniniguro naman ni Garcia, kaagad nilang ipagpapatuloy ang voter registration kapag naideklara ng ligtas ang mga lugar na sinalanta ng bagyo.
Ang voter registration sa bansa para sa 2026 BSKE ay sinimulan noong Oktubre 20, 2025 at magpapatuloy hanggang sa Mayo 18, 2026.
- Latest
