Bus ng 40 Grade 1 nagliyab sa NLEX

MANILA, Philippines — Napalitan ng takot ang masayang field trip ng mga batang estudyante at kanilang magulang nang lumiyab ang kanilang sinasakyang tourist bus nitong Miyerkules ng alas-9:00 ng gabi sa Northbound lane ng NLEX sa bahagi ng Bgy. Patubig, Marilao, Bulacan.

Ayon sa mga magulang, pauwi na umano sila matapos ang field trip ng kanilang mga anak sa isang amusement park sa Pasay City nang mapansin nila ang makapal na usok sa loob ng bus.

Nakaramdam na sila ng init hanggang sa may sumabog kaya agad nilang binitbit ang kanilang mga anak palabas ng bus at ligtas na nakalabas ang higit 40 sakay. Nagsasagawa pa ng imbestigasyon ang Bureau of Fire Protection (BFP) sa sanhi nang pagliyab ng nasabing bus.