Cebu isinailalim sa state of calamity
Sa pagtama ng 6.9 magnitude na lindol
MANILA, Philippines — Agad isinailalim sa state of calamity ang lalawigan ng Cebu nitong Miyerkules ng umaga kasunod ng matinding pinsalang tinamo sa 6.9 magnitude na lindol na nasa Bogo City ang epicenter nitong Martes ng gabi.
Habang sinusulat ang ulat na ito, nasa 69 katao na ang naitalang nasawi at inaasahang tataas pa ang bilang habang nagkukumahog at paspasan ang isinagawang search and rescue mission ng tropa ng pamahalaan para sa posible pang mga survivors na natabunan sa mga gumuhong gusali at kabahayan.
“The provincial government, through Governor Pamela Baricuatro’s Executive Order No. 57 and a resolution passed by the Provincial Board this morning, has placed the Province of Cebu under a state of calamity,” pahayag ng pamahalaang panlalawigan ng Cebu sa kanilang opisyal na Facebook account.
Ayon kay Cebu Governor Pamela Baricuatro, punuan ang mga ospital doon dahil sa dami ng mga isinusugod na mga duguang pasyente.
“Because of the high volume of patients with serious injuries, the medical staff tended to some of them outside the hospital,” post ni Baricuatro sa Facebook.
Sa tala ng National Disaster Risk Reduction and Management Council (NDRRMC) nasa inisyal na 22 gusali ang napinsala sa matinding pagtama ng lindol na ang pinakagrabeng naapektuhan ay ang Bogo City.
Ang Bogo City ay unang nagdeklara ng state of calamity dahil sa inabot na grabeng pinsala sa pagguho ng mga gusali dito, mga kabahayan at iba pang imprastraktura dahil sa lindol.
Kabilang sa mga nasawi ang tatlong miyembro ng Philippine Coast Guard (PCG) matapos silang mabagsakan ng debris sa pagguho ng San Remigio Sports Complex.
- Latest
