Lolo, 2 bisita timbog sa droga

MERCEDES, Camarines Norte, Philippines — Kalaboso ang isang 69-anyos na lolo na maintainer ng drug den kasama ang dalawang bisita nito matapos na maaresto sa ginawang buy-bust operation ng mga ahente ng Philippine Drug Enforcement Agency sa Brgy. San Roque, Mercedes, Camarines Norte kamakalawa ng hapon.

Sinampahan na ng kasong paglabag sa comprehensive dangerous drugs act of 2002 ang target na suspek na kinilalang si “Lolo Caloy”, residente ng naturang barangay at ang dalawa nitong bisita na sina alyas “Ron”, 19-anyos at “Noel”, 31-anyos.

Sa ulat ni Carlo Fernandez lll, tagapagsalita ng PDEA-Regional Office dakong alas-3 ng hapon, katuwang ang mga tauhan ng Mercedes Police at Police Drug Enforcement Group-5 ay inilatag ng PDEA-Camarines Norte Provincial Office ang buy-bust operation laban sa matanda.

Hindi na nakatakas pa pati na ang mga bisita ng lolo sa kanyang drug den makaraang palibutan at arestuhin ng mga operatiba nang iabot sa poseur buyer ang biniling droga.

Nabawi sa mga suspek ang ilang sachet ng shabu na tumitimbang ng 13-gramo at nagkakahalaga ng P81,600; aluminum foil, lighters, improvised tooters, at ang ginamit na marked money sa operasyon.