Philippine Navy sumabak sa live-fire unilateral missile exercise

MANILA, Philippines — Nagsagawa ang Philippine Navy (PN) ng live-fire unilateral missile exercise, sa kanlurang bahagi ng San Antonio, Zambales kamakalawa, gamit ang Spike Non-Line of Sight (NLOS) missile system.

Sa isang pahayag kahapon, sinabi ng Philippine Navy na idineploy nila ang AW159 anti-submarine warfare helicopter at BRP Tomas Campo (PG908) para sa naturang aktibidad. Matagumpay naman anilang naisagawa ng AW159 helicopter ang kauna-unahang aerial launch ng isang Spike NLOS at nasira ang target nito.

Nagsagawa rin ang PG908 ng isa pang coordinated Spike NLOS missile launch laban sa isang hiwalay na target.

“The AW159 helicopter successfully conducted the first-ever aerial launch of a Spike NLOS and destroyed its designated target,” anang PN. “PG908 then carried out another coordinated Spike NLOS missile launch against a separate target.”

Ayon sa PN, ang Spike NLOS ay isang precision-guided, multi-purpose missile system na binuo ng Rafael Advanced Defense Systems (RADS) ng Israel at gumagamit ng advanced electro-optical at real-time video guidance.

“Its integration into the PN’s arsenal significantly enhances standoff strike capabilities, boosting maritime defense, strategic deterrence, and operational effectiveness,” anang PN.

Nabatid na nagbigay rin ng suporta sa live-fire exercise: ang BRP Miguel Malvar (FFG06), ScanEagle UAV, Fast Attack Interdiction Craft missile-capable BRP Albert Majini (PG909), BRP Laurence Narag (PG907), Multi-Purpose Attack Crafts BA492 at BA488, gayundin ang mga units mula sa Coast Defense Regiment ng Philippine Marine Corps at BRP Suluan (MRRV4406) ng Philippine Coast Guard (PCG).

“The successful live-fire unilateral missile exercise forms part of the AFP’s broader Comprehensive Archipelagic Defense Concept (CADC),” dagdag pa ng Navy.