2 ‘assassin’ bulagta sa shootout sa Quezon
CAMP NAKAR, LUCENA CITY , Philippines — Dalawang miyembro ng gun-for-hire o assassin ang patay makaraang makipagbarilan umano sa mga pulis sa Barangay Sumilang, Calauag, Quezon, kamakalawa ng hapon.
Ayon kay Quezon Police Provincial Office ( QPPO) Director PCol. Romulo Albacea, target sana ng buy-bust operation ang dalawang suspek na lulan ng isang AUV.
Sa halip na huminto, dakong alas-3:00 ng hapon sa checkpoint, nagpaputok ang mga suspek sa direksiyon ng mga pulis at mabilis na pinasibad ang kanilang sasakyan.
Nagkaroon ng habulan at palitan ng putok hanggang sa mapatay ang dalawa. Isa sa mga suspek ang napatay sa loob ng sasakyan, habang ang kasama ay tumimbuwang sa gilid ng highway na may tama ng bala. Wala namang nasaktan sa mga pulis.
Dagdag pa ni Col. Albacea, sangkot ang mga suspek sa iba’t ibang krimen at pagpatay sa Candelaria, Quezon.
Sa ngayon, patuloy ang imbestigasyon ng SOCO sa crime scene at inaalam ang pagkakakilanlan ng mga napaslang na suspek.
- Latest
